မြင့်မြတ်သော ပေးဆပ်ခြင်း (၁)
- ကိုယ့်အကျိုးကိုယ့် စီးပွားအတွက်သာမက
- သူတစ်ပါးအကျိုး
- သူတစ်ပါးစီးပွားအတွက်ပါ
- အလုပ်လုပ်နေတဲ့သူကတော့
- မြင့်မြတ်တဲ့ ပေးဆပ်ခြင်းနဲ့
- ဘ၀ကို ပေးဆပ်နေရတဲ့သူတွေ ဖြစ်ပါတယ်။
(၁)
'ပေး 'ဆိုတဲ့စကားလုံးကို တစ်ခြားစကားလုံးတွေနဲ့ တွဲဖက်ပြီး ' ပေးကမ်း' တယ်၊ 'ပေးဝေ' တယ်၊ 'ပေးစား ' တယ်၊ 'ပေးအပ် ' တယ်၊ 'ပေးဆပ် ' တယ်၊ စသည်ဖြင့် အခြေအနေ အဖြစ်အပျက်တွေ ပေါ်မူတည်ပြီး အမျိုးမျိုး သုံးနှုန်းကြပါတယ်။
ကိုယ့်လက်ထဲက ပစ္စည်းသူတစ်ပါးလက်ထဲထည့်ပေးတာကို ပေးကမ်းတယ်လို့ ခေါ်ပါတယ်။ တစ်ဖက်သား ကာင်းကျိုးရစေချင်တဲ့ စေတနာသက်သက်နဲ့ ပေးကမ်းတာမျိုးရှိသလို ကိုယ့်အကျိုးအတွက် အခွင့်အရေးတုံ့ပြန်မှုကို မျှော်လင့်ပြီး ပေးကမ်းတာမျိုးလည်း ရှိပါတယ်။ စေတနာ သန့်သန့်နဲ့ ပေးကမ်းတာကို ဒါနကုသိုလ်လို့ ခေါ်ပြီး၊ ကိုယ်ကျိုး မျှော်လင့်ချက်နဲ့ ပေးတာကိုတော့ လာဘ်ထိုးတယ်လို့ ခေါ်ပါတယ်။
ကိုယ့်ရဲ့ ပိုင်ဆိုင်မှုကို ကိုယ်တစ်ယောက်တည်း စွဲဆုပ်သိမ်းပိုက် မထားပဲ သူတစ်ပါးကို မျှဝေပေးတာကိုတော့ 'ပေးဝေ' တယ်လို့ ခေါ်ပါတယ်။ ကိုယ်နဲ့ ဆွေမျိုးသွေးသား လုံးဝမတော်စပ်သူကို သနား ဂရုနာစိတ်နဲ့ ပေးဝေတာမျိုးရှိသလို ကိုယ့်ဆွေမျိုး ကိုယ့်သွေးသားကို ချီးမြှောက်ထောက်ပံ့တဲ့ အနေနဲ့ ပေးဝေတာမျိုးလည်းရှိပါတယ်။ ဘာတုံ့ပြန်မှုကိုမှ မမျှော်လင့်ရင် ကုသိုလ်စိတ်ဖြစ်ပြီး တစ်စုံတစ်ခုတုံ့ပြန်မှုကို မျှော်လင့်ရင်တော့ အကုသိုလ်ရောနှောနေပါတယ်။ ကိုယ့်သားကိုယ့်သမီးကို သူတစ်ပါးသား သူတစ်ပါးသမီးနဲ့ ထိမ်းမြားလက်ထပ်ပေးတာကို 'ပေစား' တယ်လို့ ခေါ်ပြီး၊ တစ်စုံတစ်ယောက်ကို တာဝန်တစ်ခုခု ဒါမှမဟုတ် အခွင့်အရေးတစ်ခုခု ဒါမှမဟုတ် ကောင်းကျိုးရလဒ်တစ်ခုခု ပေးလိုက်တာကိုတော့ 'ပေးအပ်' တယ်လို့ခေါ်ပါတယ်။
ကိုယ့်ကြွေးရှင်ကို ကိုယ်ယူထားတဲ့ ကြွေးပြန်ပေးတာ၊ ကိုယ့်ကျေးဇူးရှင်ကို ကိုယ်ရဖူးတဲ့ ကျေးဇူးအတွက် ကျေးဇူးအသစ်တစ်မျိုး တုံ့ပြန်တာကို 'ပေးဆပ်' တယ်လို့ ခေါ်ပါတယ်။ အတိပ်ဘ၀တွေက ကိုယ်ပြုခဲ့တဲ့ မကောင်းမှုအကုသိုလ်ရဲ့ ဆိုကျိုးကို ကိုယ်ကိုယ်တိုင် ပြန်ခံစားနေရတာကိုလည်း 'ပေးဆပ်' တယ်လို့ ခေါ်ပါတယ်။
(၂)
ကုသိုလ်ကံတွေ အကုသိုလ်ကံတွေဆိုတာ တကယ်တော့ 'ကြွေး' တွေပါပဲ။ ကုသိုလ်ကံကြောင့် သုဂတိဘုံမှာ လူ၊ နတ် ဖြစ်နေတာလည်း ကြွေးဆပ်နေရတာပါပဲ။ အကုသိုလ်ကံကြောင့် ဒုဂ္ဂတိဘုံတွေမှာ ငရဲ၊ တိရိစ္ဆာန်ဖြစ်နေရတာလည်း ကြွေးဆပ်နေရတာပါပဲ။ ရုပ်နာမ်ခန္ဓာပိုင်ရှင်သတ္တ၀ါမှန်သမျှ ကြွေးဆပ်နေရသူတွေ ချည်းပါပဲ။ 'ကြွေးဆပ်' နေရတာကိုပဲ 'ပေးဆပ်' နေရတယ်လို့ ယာဉ်ယာဉ်ကျေးကျေး သုံးနှုန်းကြပါတယ်။
အတိတ်ကံကြောင့် ရလာတဲ့ ရုပ်နာမ်ခန္ဓာကို ပြုစုစောင့်ရှောက်နေရတာဟာ 'ပေးဆပ်' နေရတာပါ။ ခန္ဓာစားဖို့၊ ခန္ဓာဝတ်ဖို့ ၊ ခန္ဓာနေဖို့ ခန္ဓာကျန်းမာဖို့၊ ခန္ဓာချမ်းသာဖို့ နည်းအမျိုးမျိုးနဲ့ ရုံန်းကန်လှုပ်ရှားနေရတာဟာ 'ပေးဆပ်' နေရတာပါ။
ရထားတဲ့ခန္ဓာလေးတည်မြဲနေအောင်၊ ရထားတဲ့ ဘ၀လေးရှင်သန်နေအောင် ပုံစံအမျိုးမျိုးနဲ့ ပြုပြင်ဖန်တီးပေး နေရတာဟာ ကိုယ့်ကံကြွေးကြောင့် ကိုယ်ရလာတဲ့ ဘ၀ခန္ဓာအတွက် ကိုယ်ကိုယ်တိုင် ပေးဆပ်နေရတာပါပဲ။ ကိုယ့်ကံက သူတစ်ပါးကို ထိခိုက်ပျက်စီးအောင်လုပ်ခဲ့တဲ့ အကုသိုလ်ကံဆိုရင်တော့ သာမန်ပေးဆပ်နေရသူတွေထက် အဆပေါင်းများစွာ အပင်ပန်းအဆင်းရဲခံပြီး ပေးဆပ်ရမှာပေါ့။
'ခန္ဓာဝန်' ကို ပင်ပန်းဆင်းရဲစွာ ထမ်းဆောင်ရင်း (ကုသိုလ်ကံ အားကြီးသူတွေ အတွက်တော့ 'ပင်ပန်းချမ်းသာစွားထမ်းဆောင်ရင်း' လို့ ပြောလို့ရမယ်ထင်ပါရဲ့၊ ပင်ပန်းတာကတော့ ပင်ပန်းတာပါပဲ။) ပေးဆပ်နေရတာချင်းအတူတူ တချို့က ကိုယ့်ခန္ဓာဝန်ကိုပဲ ကိုယ်ထမ်းပြီး အမြင်ကျဉ်းမြောင်းစွာ ပေးဆပ်နေကြသလို တချို့ကတော့ သူတစ်ပါး ခန္ဓာဝန်ကိုပါ ကူထမ်းပေးပြီး အမြင်ကျယ်ပြန့်စွာ ပေးဆပ်ကြတယ်။
ကိုယ့်အကျိုး၊ ကိုယ့်စီးပွား တစ်ခုတည်းအတွက်ပဲ အလုပ်လုပ်နေတဲ့သူဟာ 'နိမ့်ကျတဲ့ ပေးဆပ်ခြင်း' နဲ့ ဘ၀ကို ပေးဆပ်နေရတဲ့သူပါ။ ကိုယ့်အကျိုးကိုယ့်စီးပွား အတွက်သာမက သူတစ်ပါးအကျိုး၊ သူတစ်ပါးစီးပွားအတွက်ပါ အလုပ်လုပ်နေတဲ့သူကတော့ 'မြင့်မြတ်သော ပေးဆပ်ခြင်း' နဲ့ ဘ၀ကို ပေးဆပ်နေရတဲ့သူ ဖြစ်ပါတယ်။
ဘ၀ရှိသူတိုင်း ပေးဆပ်နေသူတွေချည်းမို့ ပေးဆပ်နေရတာ ချင်းအတူတူ မြင့်မြတ်တဲ့ ပေးဆပ်ခြင်းနဲ့ ပေးဆပ်နေရတဲ့သူတွေဟာ အတိတ်ကံအကြွေးကြောင့် ရလာတဲ့ ဘ၀ခန္ဓာကို ထိုက်ထိုက်တန်တန် အသုံးချရာရောက်တဲ့ အတွက် သူတို့ကို 'လူဖြစ်ကျိုးနပ်သူတွေ' လို့ သတ်မှတ်နိုင်သလို 'လောကကို အလှဆင်သူတွေ' လို့လည်း ဂုဏ်ပြုနိုင်ပါတယ်။
(၃)
သံသရာမှာ ဆွေမျိုးသွေးသား မတော်စပ်ခဲ့ဖူးတဲ့သူရယ်လို့ တစ်ဦးတစ်ယောက်မှ မရှိတဲ့အတွက် ကိုယ်နဲ့ထိတွေ့ ပတ်သက်လာသမျှ လူသားတိုင်းဟာ ကိုယ့်ရဲ့ ဆွေမျိုးသွေးသားတွေ ချည်းပါပဲ။ အဲဒီဆွေမျိုးသွေးသားတွေက ကိုယ့်အပေါ် ဘ၀တစ်ခုခုမှာ ကျေးဇူးတစ်ခုခုတော့ အနည်းဆုံးပြုခဲ့ကြဖူးမှာဖြစ်လို့ မြင်မြင်သမျှ လူသားတိုင်းဟာ ကိုယ့်ရဲ့ ကျေးဇူးရှင်တွေ ချည်းလည်း ဖြစ်နေပြန်ပါတယ်။
သူတော်ကောင်းစိတ်ဓာတ် အဆင့်မြင့်တဲ့ ပုဂ္ဂိုလ်ဟာ ဒီဘ၀ ကျေးဇူးရှင်တွေကို သာမက သံသရာ ဘ၀အဆက်ဆက်က ကျေးဇူးရှင်တွေကိုပါ 'ကျေးဇူးရှင်' လို့သတ်မှတ်ပြီး ကျေးဇူးသိလေ့ ကျေးဇူးဆပ်လေ့ ရှိပါတယ်။
ဒီဘ၀ကိုယ့်အပေါ် တိုက်ရိုက်ကျေးဇူးပြုသူတွေရဲ့ အကျိုးစီးပွားကို ရွက်ဆောင်ပေးတဲ့အပြင် ကိုယ်နဲ့ ကျေးဇူးခံ ကျေးဇူးစား လုံးဝမပတ်သက်တဲ့သူတွေရဲ့ အကျိုးစီးပွားကိုလည်း ရွက်ဆောင်ပေးပါတယ်။
ကြုံတွေ့လာသမျှ လူသားတိုင်းရဲ့ အကျိုးစီးပွားကို ကိုယ်စွမ်းနိုင်သမျှ မေတ္တာစေတနာ အပြည့်နဲ့ ကူညီရွက်ဆောင်ပေးတာကိုပဲ ဒီဘ၀ကျေးဇူရှင်၊ သံသရာကျေးဇူးရှင်တွေကို တွေကို ကျေးဇူးတုံ့ပြန်နေတာမို့ 'ကျေးဇူးဆပ်တယ်' လို့ ခေါ်ပါတယ်။ မျက်မှောက်မျက်ကွယ် ကျေးဇူးရှင်တွေကို 'ကျေးဇူးဆပ်' နေတာကိုပဲ ' ပေးဆပ်' နေရတယ်လို့ ပေါ့ပေါ့ပါးပါး သုံးနှုန်းကြပါတယ်။
ကျေးဇူးတရားကို သိနားလည်တဲ့ သူတော်ကောင်းမှန်သမျှ ကိုယ်နဲ့ ကိုယ်နဲ့ ထိတွေ့ပတ်သက်လာသူတွေရဲ့ အကျိုးစီးပွားကို ကိုယ်စွမ်းနိုင်တဲ့ဘက်က သို့မဟုတ် ကိုယ်စိတ်ဝင်စားတဲ့ အခန်းကဏ္ဍက အတတ်နိုင်ဆုံး ကူညီဆောင်ရွက်ပေးရင်း ကျေးဇူးတရားကို တုံ့ပြန်ပေးဆပ်နေကြတာမို့ လောကအတွက် ပေးဆပ်နေကြတဲ့အတွက် ပရဟိတ သူတော်ကောင်းတိုင်းကို 'မြင့်မြတ်စွာပေးဆပ် နေသူများ' လို့ ကမ္ပည်းထိုးနိုင်ပါတယ်။
(၄)
ကြွေးဆပ်တဲ့ အနေနဲ့ပဲ ပေးဆပ်ပေးဆပ်၊ 'ကျေးဇူးဆပ်' တဲ့အနေနဲ့ပဲ ပေးဆပ်ပေးဆပ်၊ အများအကျိုးပြု ပရဟိတအလုပ်တစ်ခုခု၊ သို့မဟုတ် တစ်ခုထက်များစွာနဲ့ လောကကို ပေးဆပ်နေသူ မှန်သမျှ စိတ်ဓာတ်အဆင့်အတန်းမြင့်မားတဲ့ သူတော်ကောင်း၊ သူမြတ်လောင်း တွေချည်းပါပဲ။ 'သူမြတ်လောင်း' ဆိုတဲ့နေရာမှာ ဗုဒ္ဓလောင်းလျာ၊ ပစ္စေကဗုဒ္ဓါလောင်းလျာ အထိပါဝင်ပါတယ်။
အမျာအကျိုးပြု ပရဟိတ အလုပ်တွေ အများကြီးရှိတဲ့ အထဲမှာ ဒကာကျောသူ (အကယ်ဒမီ ကျော်သူ) တို့ အဓိကလုပ်နေတဲ့ အလုပ်က နာရေးဒုက္ခ ကြုံတွေ့နေရသူတွေကို ကူညီပေးတဲ့ 'နာရေးကူညီမှု' အလုပ်ဖြစ်ပါတယ်။
အတိအကျပြောရရင်တော့ 'သေရေးကူညီမှု' အလုပ်ပါ။ ဒါပေမဲ့ 'သာရေးနာရေး' လို့ ကာရန်ကိုက်အောင်၊ ဒါမှမဟုတ် အများနားခံသာအောင် အစဉ်အဆက် သုံနှုန်းခဲ့ကြတဲ့အတွက် 'သေရေးကူညီမှု' ကိုပဲ 'နာရေးကူညီမှု' လို့ ရှေးထုံးဝေါဟာရအတိုင်း ကင်ပွန်းတပ်ထားရပါတယ်။
သေဆုံးသွားသူနဲ့ ပတ်သက်တဲ့ ကျန်ရစ်သူတွေရဲ့ ပူပင်သောက များစွာနဲ့ စိတ်နှစ်လုံးနာကျင် ညှိုးနွမ်းမှု (စိတ်အနာ) ကို အနာသက်သာအောင် ကူညီပေးတာလို့ အဓိပ္ပာယ်ဖွင့်ရင်တော့ 'နာရေးကူညီမှု' ဟာစကားလုံးလှပအောင် သုံးနှုန်းထားတာမဟုတ်တော့ဘဲ တိုက်ရိုက်အဓိပ္ပာယ်အနေနဲ့ သုံးနှုန်းထားတာ ဖြစ်သွားပါတယ်။
'နာရေး' က 'မသေခင်နာရေး' နဲ့ 'သေပြီးနာရေး' လို့ နှစ်မျိုးရှိပါတယ်။ 'မသေခင်နာရေး' ကို သေမယ့်သူ ကာယကံရှင်ကိုယ်တိုင်ရော ပတ်သက်ဆက်စပ်သူတွေပါ ခံစားရပြီး 'သေပြီးနာရေး' ကိုတော့ ကျန်ရစ်သူတွေသာ ခံစားရပါတယ်။
'မသေခင်နာရေး' ရဲ့ ဆင်းရဲဒုက္ခကို အဓိကခံစားရသူက သေမယ့်သူကိုယ်တိုင်ပါ။ သေမယ့်သူက ရောဂါဝေဒနာ စွဲကပ်နေသူဆိုရင် ရောဂါဝေဒနာ ဒဏ်ကိုလည်းခံရပါတယ်။ ( ရောဂါဝေဒနာ သက်သာစေမယ့် ဆေးဝါးဓာတ်စာ မတတ်နိုင်ဘူးဆိုရင် အခြေအနေ ပိုဆိုးပါတယ်။) သေရတော့မှာလား ဆိုတဲ့အသိကြောင့် လည်း(တရားမရှိရင်) စိတ်ဆင်းရဲရပါတယ်။
(ရန်ကုန်မြို့ နာရေးကူညီမှုအသင်း ဒုတိယ နှစ်ပတ်လည်း အထိမ်းအမှတ် အဖြစ် ထုတ်ဝေသော ပေးဆပ်သူများ စာအုပ်အတွက် ဆရာတော် အရှင်ဆန္ဒာဓိက ရေသားသော "မြင့်မြတ်သော ပေးဆပ်ခြင်း" အမှာစာ ဖြစ်ပါတယ်။ စာရိုက်ရင်း မျက်စေ့ပင်ပန်းလာလို့ ၂ ပိုင်းခွဲပြီးတင်ပေးပါ့မယ်။ ဒုတိယပိုင်းမှာတော့ ဆရာတော်က ကိုကျော်သူနဲ့ နာမည်ရော၊ လုပ်ရပ်ပါ ဆင်တူနေတဲ့ ယသသူဌေးသား ပုံဝတ္ထုကို ပြောပြထားပါတယ်။ ဆက်တင်ပေးပါ့မယ်။ အားလုံးကိုကျေးဇူးတင်ပါတယ်။ )
Posts
